反修例風波引起的逆權運動近來越演越烈，同時影響到在娛樂圈不少藝人為保大陸市場都不敢對事情表態，更甚的是被迫公開表忠，連日來一直支持反修例，站在示威者一邊的阮民安（Tommy）亦受影響，日前就有大陸網民將他在Facebook上言論截圖，然後轉發到他太太Eva的微博上，遭大批網民留言辱罵夫婦二人乃「港獨分子」。
相關新聞：【撐學生】義載司機出動途中壞車 「嗰刻驚仔女以為係個局唔再信我」
昨晚Tommy現身南昌站出席電影《曳曳同學會》首映時就透露經此一役，未來工作的確有受影響，他說：「原本我同太太聽日就要飛上海出席時裝周，而家就取消咗，主辦方話係政治因素，我同太太已經連續出席咗四年。」
Tommy表示工作被取消的確有影響收入，但自己熱愛香港，不會因為賺人民幣而下跪，更不會收回在Facebook上講過的所有言論，他說：「可能有啲人會話『你喺大陸有鬼嘢做咩？』我而家就同你哋講，我聽日個騷就被佢哋取消咗，我相信90%藝人都唔會好似我咁。」
相關新聞：【白色恐怖】過來人分享大陸過關查手機經過 四招保你出入平安
講到和太太創立的時裝品牌下月中就正式面世，可會因今次風波影響未來發展？Tommy說：「其實我哋品牌主要係喺東京創立，坦白講本身中國係第二主力市場，但而家咁樣惟有努力啲開拓台灣、香港同其他地方。」雖然大陸網民去到太太的微博踩場，但Tommy表示太太會維持初心，繼續在微博上分享日常生活：「微博班友而家成日洗版，講真太太以前都未遇過，但唔緊要我哋做好自己，只係純粹分享生活。」
同場還有余香凝和邵音音等，其中余香凝就透露即將在9月重返校園，報讀公開大學，她說：「其實我本來只係得中七程度，出咗嚟拍戲做演員後，發現自己諗嘢比較單向，於是下定決心想豐富自己。」將修讀社會心理學的她又稱，未來會兼職讀書和演藝工作。
其後Tommy在facebook再為事件留言兼貼了與主辦方的對話截圖，他表示對特首的回應已經沒有任何感覺，作為香港人只有自救，他還說：「仲有一樣嘢想講(唔好意思，有啲煩...講埋最後一次，唔會再理，唔會再講)，其實真喺仲有一大堆人喺度講Tommy咁做係為咗點點點嘅言論！好，咁我再同大家講一樣嘢，本來我聽日同Eva喺半年前已經傾好嘅上海工作已經被取消(呢個只係其中一個例子)，我哋出席呢個時裝show已經超過四年，而喺我地嚟緊最需要市場去發展品牌嘅時間，我依然選擇發聲，同大家一齊抗爭，我同大家講，99%嘅商人同藝人都唔會咁樣選擇！」他還說：「如果咁都仲係Tommy扮嘢、無嘢輸、要拎光環，我想同你哋講：『你收皮啦，ok？』不過唔使去都好，31號就可以再一次同大家一齊企出嚟，表達訴求！各手足，抗爭路漫長，唔好氣餒，無懼白色恐懼，31號民陣遊行，街上見！我一定在！」
https://hk.entertainment.appledaily.com/enews/realtime/article/20190829/59984652
No comments:
Post a Comment