熟悉嘅香港，越來越陌生。
呢幾星期不停睇到報導，各行各業都有反送中或不滿警察濫暴嘅朋友，因自己社交媒體私人戶口上嘅言論，或喺公餘時間參與社會運動，而被秋後算帳，導致調職或被炒，香港職場籠罩前所未有嘅白色恐佈。
林鄭政府無心讓步，要同抗爭者打消耗戰，運動更睇唔到完結嘅盡頭。
抗爭沒完沒了，但飯總要開。只因自由表達想法而失去飯碗，荒謬得匪夷所思，但悲憤過後總要面對生計問題。
我自己營運嘅公司屬中型企業，唔可能聘請曬所有受影響嘅同路人，但還幸近十年因為「徐緣」呢個身份，認識咗好多香港商界嘅朋友，我希望呢個關係網絡，可以幫得幾多得幾多。
懇請每位認識我嘅商界朋友，若果你公司有空缺，或有心招募這班受白色恐怖影響嘅香港人，請喺 Facebook 私訊我，閣下身份與公司名稱我會保密處理，只純作私下人才轉介之用。
呢十年間，因緣際會下幫過唔少商界中人，之前被碌過好多人情咭，呢啲人情，若果你地想還俾我，我希望你地可以用呢個方法還，幫吓呢班無辜嘅人。
當然前提係工種及經驗要合適，在商言商唔係開善堂，都唔可以夾硬請，但冀望大家抱持開放態度，增加配對機會。喺呢個艱難時刻雪中送炭，相信佢地會將心比心，或會成為你公司最好嘅員工。
私下唔認識我嘅商界人士，若對我有所信任，亦歡迎你私訊我，話我知你嘅公司背景，以及所需員工嘅類型同資歷。有關資料同樣保密，我收到受影響人士嘅 Resume 而覺得能與你公司配對，會私下聯絡你，你有興趣才自行安排約見。
至於因白色恐怖影響到飯碗嘅朋友，請將閣下履歷 Message 到徐緣 Facebook，我會盡量安排轉介。我得一對手做，若處理需時，還請見諒。也請體諒配對未必一定成功，而最後有幾多良心僱主願意出手相助，我也估計唔到。香港商界固然藍絲佔多，但熱血嘅有心商人仲未絕種，只係唔方便企得太前咁公開表態，但我知唔少都會暗中幫手。
香港前路茫茫，只希望大家唔好氣餒。
我個人力量有限，盡做。
https://thestandnews.com/politics/%E5%8F%8D%E7%99%BD%E8%89%B2%E6%81%90%E6%80%96%E4%BA%BA%E6%89%8D%E9%85%8D%E5%B0%8D%E6%9C%8D%E5%8B%99/
No comments:
Post a Comment